പൂതക്കുളം
കൊല്ലം ജില്ലയില് ചാത്തന്നൂര് മണ്ഡലത്തിന്റെ തെക്കുപടഞ്ഞാറേയറ്റത്ത് ഇടവാ-നടയറ കായലിനോട് ചേര്ന്നു കിടക്കുന്ന ഒരു ഗ്രാമപ്രദേശമാണ് പൂതക്കുളം. 1953 ആഗസ്റ്റ് ഒന്നിനാണ് പൂതക്കുളം പഞ്ചായത്ത് രൂപീകൃതമായത്. അതിന് മുമ്പ് പരവൂര് പഞ്ചായത്തില് ഉള്പ്പെട്ടതായിരുന്നു ഈ ഗ്രാമം. പരവൂര് പഞ്ചായത്താഫീസില് വച്ച് പബ്ളിക് ഹെല്ത്ത് ഓര്ഗനൈസര് എസ്.ബാലകൃഷ്ണന് നായരുടെ അധ്യക്ഷതയില് കൂടിയ യോഗത്തില് വച്ച് കെ. കുഞ്ഞുണ്ണിപ്പിളളയെ പ്രസിഡന്റായി ഐകകണ്ഠേന തെരഞ്ഞെടുത്തു(1953-63). കെ. കുഞ്ഞുണ്ണിപ്പിളള (പ്രസിഡന്റ്), ഡോ.പി.കൃഷ്ണന്നായര്(വൈസ് പ്രസിഡന്റ്), കെ.പി.ഗോപാലപിളള, വി.ശിവശങ്കരപ്പിളള, പി.നാരായണന്, എസ്.അച്യുതന്, എന്.നാരായണപ്പിള്ള, സി.എന്.ചെല്ലപ്പന്പിള്ള എന്നിവരായിരുന്നു ആദ്യകാല ഭരണകര്ത്താക്കള്. സമ്പന്നമായൊരു സാംസ്ക്കാരിക പൈതൃകമാണ് പൂതക്കുളത്തിനുളളത്. നിരവധി സാംസ്ക്കാരിക നായകന്മാര്ക്ക് ഈ പ്രദേശം ജന്മം നല്കിയിട്ടുണ്ട്. ഇവിടെ ജീവിച്ചിരുന്ന പ്രശസ്തരായ കഥകളി നടന്മാരായിരുന്നു കൊക്കാടന് നാരായണപിള്ള, തെറ്റിക്കുളം പരമുപിള്ള തുടങ്ങിയവര്. നൃത്തകലയില് പ്രശസ്തനായിരുന്ന ഗുരു ഗോപിനാഥ് കൊക്കാടന് നാരായണപിള്ളയുടെ ശിഷ്യനായിരുന്നു. ഗതാഗതസൌകര്യം തീരെ കുറവായിരുന്ന ഇവിടെ 70 വര്ഷങ്ങള്ക്കു മുമ്പു വരെ കാളവണ്ടിയായിരുന്നു പ്രധാന വാഹനം. കാളവണ്ടികള്ക്ക് കഷ്ടിച്ചു കടന്നുപോകാന് പറ്റും വിധമുളള വഴികളും കാല്നടപ്പാതകളും മാത്രമായിരുന്നു റോഡ്. ഇന്നു കാണുന്ന പ്രധാന റോഡുകളായ പരവൂര്-പാരിപ്പളളി റോഡ്, ഊന്നിന്മൂട്-പരവൂര് റോഡ്, ആലിന്റെമൂട്-ഒഴുകുപാറ റോഡ് എന്നിവ ജനകീയപങ്കാളിത്തത്തോടെ നിര്മ്മിച്ചവയായിരുന്നു.
ചരിത്രം
സാമൂഹ്യ സാംസ്കാരിക ചരിത്രം
കൊല്ലം ജില്ലയില് ചാത്തന്നൂര് മണ്ഡലത്തിന്റെ തെക്കുപടഞ്ഞാറേയറ്റത്ത് ഇടവാ-നടയറ കായലിനോട് ചേര്ന്നു കിടക്കുന്ന ഒരു ഗ്രാമപ്രദേശമാണ് പൂതക്കുളം. ഒരു കാലത്ത് ഘോരവനമായിരുന്ന ഇവിടെ ശ്രീഭൂതനാഥന്റെ രൂപം പ്രത്യക്ഷപ്പെടുകയും ഭക്തജനങ്ങള്ക്ക് ദര്ശനത്തിനായി പ്രതിഷ്ഠിക്കപ്പെടുകയും ചെയ്തു എന്നാണ് ഐതിഹ്യം. ഈ ഐതിഹ്യത്തില് നിന്നുമാണ് ഭൂതത്തുളം എന്ന പേരുണ്ടായത് എന്നു വായ്മൊഴികള് സൂചിപ്പിക്കുന്നു. പില്ക്കാലത്ത് ഇത് ലോപിച്ച് പൂതക്കുളം ആയി. പൂതം എന്നാല് പരിശുദ്ധം എന്നാണര്ത്ഥം. അതിനാല് പരിശുദ്ധമായ പ്രദേശം എന്ന അര്ത്ഥത്തിലും പൂതക്കുളം എന്നു വിളിക്കപ്പെടുന്നു. പൊതുവില് ശാന്തിയും സമാധാനവും കളിയാടുന്ന ഒരു പ്രദേശമാണ് പൂതക്കുളം. കുന്നുകളോ താഴ്വരകളോ ഇല്ലാത്ത, സമുദ്രനിരപ്പില് നിന്നും അധികം ഉയരമില്ലാത്ത ഒരു ഗ്രാമപ്രദേശം. ഒരു വശത്ത് കുഞ്ഞോളങ്ങള് കളിയാടുന്ന കായല്ത്തീരങ്ങളുള്ള ഈ പ്രദേശം വയലേലകളാലും അനുഗ്രഹീതമാണ്. 1952 വരെ പൂതക്കുളം പരവൂര് വില്ലേജ് പഞ്ചായത്തിന്റെ ഭാഗമായിരുന്നു. 1953ല് പൂതക്കുളം, നെല്ലേറ്റില്, കലയ്ക്കോട് എന്നീ പ്രദേശങ്ങളും കൂനയില് പ്രദേശവും ചേര്ത്ത് പൂതക്കുളം പഞ്ചായത്ത് രൂപീകൃതമായി. കെ.കുഞ്ഞുണ്ണിപ്പിള്ളയായിരുന്നു ആദ്യത്തെ പഞ്ചായത്തുപ്രസിഡന്റ്. 1962 ല് വില്ലേജ് പുനഃസംഘടന നടന്നപ്പോള് കൂനയില് പ്രദേശം പരവൂരിനു വിട്ടുകൊടുക്കുകയുണ്ടായി. 1936 ശ്രീ ചിത്തിര തിരുനാള് മഹാരാജാവ് ക്ഷേത്രപ്രവേശന വിളംബരം പുറപ്പെടുവിച്ചിരുന്നുവെങ്കിലും 1946 വരെ പൂതക്കുളത്തെ ശ്രീ ധര്മശാസ്താ ക്ഷേത്രത്തില് ഹരിജനങ്ങള്ക്ക് ആരാധനാ സ്വതന്ത്ര്യം അനുവദിച്ചിരുന്നില്ല.
സ്വാതന്ത്ര്യ സമര ചരിത്രം
ബ്രിട്ടീഷ് സാമ്രാജ്യ വാഴ്ചയുടെയും ദിവാന് ഭരണത്തിന്റെയും ഭീകരത അനുഭവിച്ചറിഞ്ഞവരാണ് ഈ നാട്ടിലെ അടിസ്ഥാനവര്ഗം. സ്വാതന്ത്ര്യത്തിനും ഉത്തരവാദ ഭരണത്തിനും വേണ്ടി നടന്ന പോരാട്ടം ഈ നാട്ടിലെ തൊഴിലാളികളെയും ആവേശം കൊള്ളിച്ചിരുന്നു. ദിവാന് സി.പി. രാമസ്വാമി അയ്യരുടെ കിരാതവാഴ്ചയ്ക്കെതിരെ സ്റ്റേറ്റ് കോണ്ഗ്രസ് പ്രവര്ത്തകര് എസ്.മാധവന്പിളള, വി.വാസുപിളള, ആര്.അച്യുതന് എന്നിവരുടെ നേതൃത്വത്തില് പ്രതിഷേധയോഗങ്ങളും പ്രകടനങ്ങളും സംഘടിപ്പിച്ചിരുന്നു. ദിവാന് സി.പി.ക്ക് അനുകൂലമായും ചിലര് യോഗങ്ങള് സംഘടിപ്പിച്ചു. സി.പി.ക്ക് അനുകൂലമായി കലയ്ക്കോടു വച്ച് സംഘടിപ്പിച്ച യോഗത്തിലേക്ക് ഇരച്ചു കയറിയ സ്വാതന്ത്ര്യസമരക്കാരെ സി.പി. അനുകൂലികള് തല്ലിച്ചതച്ചു. ഇതിനെതിരെ കലയ്ക്കോട് സംഘടിപ്പിച്ച പ്രതിഷേധ യോഗത്തിനു നേരെ സിപിയുടെ അഞ്ചുരൂപ പോലീസ് നടത്തിയ ആക്രമണത്തിന്റെ ഫലമായി പലര്ക്കും പരിക്കുപറ്റി. സ്റ്റേറ്റ് കോണ്ഗ്രസ് പ്രവര്ത്തകരില് പലര്ക്കും ജയിലില് പോകേണ്ടി വന്നു. ഉത്തരവാദഭരണത്തിനുവേണ്ടി ഈ പ്രദേശത്തെ സ്റ്റേറ്റ് കോണ്ഗ്രസ് പ്രവര്ത്തകര് നടത്തിയ സമരങ്ങള് ആവേശകരമായിരുന്നു.
വിദ്യാഭ്യാസ ചരിത്രം
19-ാം നൂറ്റാണ്ടിന്റെ അവസാനത്തോടെ 1875 ല് ആണ് ഈ പ്രദേശത്ത് ആദ്യമായി ഒരു വിദ്യാഭ്യാസ സ്ഥാപനം ആരംഭിക്കുന്നത്. പനയറ ശങ്കുപിള്ള എന്ന കൊട്ടാരംകാര്യസ്ഥന്റെ ശ്രമഫലമായി അയ്യരാലിന്മൂടില് സ്ഥാപിതമായ സര്ക്കാര് പള്ളിക്കൂടമാണ് ഇവിടത്തെ ആദ്യത്തെ വിദ്യാലയം. മലയാളം മീഡിയം സ്കൂള് ആയി പ്രവര്ത്തിച്ചിരുന്ന ഈ വിദ്യാലയം, 1951 ല് ഹൈസ്ക്കൂളായി ഉയര്ത്തപ്പെട്ടു. ഇതിനോടനുബന്ധിച്ച് പ്രവര്ത്തിച്ചിരുന്ന എല്.പി. സ്കൂളുകള് കുട്ടികളുടെ വര്ദ്ധനവും സ്ഥലപരിമിതിയും മൂലം ഹൈസ്കൂളിന്റെ തെക്കും വടക്കും ഭാഗങ്ങളില് രണ്ടു പ്രത്യേക സ്ഥാപനങ്ങളായി പ്രവര്ത്തനം തുടങ്ങി. 1940 മുതല് ചെമ്പകശ്ശേരിയില് ഒരു നിശാ പാഠശാല പ്രവര്ത്തിച്ചിരുന്നു. കുറെക്കാലങ്ങള്ക്ക് ശേഷം ഇതൊരു ഹരിജന് വെല്ഫയര് സ്കൂളായി പരിവര്ത്തനം ചെയ്തു. ഈ സ്കൂള് കൊട്ടാരക്കര പ്രദേശത്തേക്ക് മാറ്റപ്പെട്ടതിനെ തുടര്ന്ന് ആര്. അച്ചുതന്റെ മാനേജ്മെന്റിന് കീഴില് ഒരു എല്. പി. സ്കൂള് അനുവദിക്കപ്പെട്ടു. 1951 ലാണ് ഇത് സ്ഥാപിച്ചത്. ഇതിനോടനുബന്ധിച്ച് 1959-60 ല് ഒരു യു.പി സ്കൂളും ആരംഭിച്ചു. 1966 ല് ഒരു ഹൈസ്ക്കൂള് കൂടി പ്രവര്ത്തനം ആരംഭിച്ചു. പുത്തന്കുളത്ത് ഡോ. ദേവരാജന്റെ മാനേജ്മെന്റിന് കീഴില് പ്രവര്ത്തനം ആരംഭിച്ച ദേവരാജ വിലാസം എല്.പി. സ്ക്കൂള്, 1964 ല് സ്ഥാപിതമായി. കലയ്ക്കോട് ഏകദേശം 75 വര്ഷങ്ങള്ക്ക് മുമ്പ് ഒരു പ്രൈമറി സ്കൂള് സ്ഥാപിച്ചത് പില്ക്കാലത്ത് സര്ക്കാര് ഏറ്റെടുക്കുകയും മറുനാടന് മലയാളികളുടെ സഹായത്തോടുകൂടി യു.പി.സ്കൂളായി ഉയര്ത്തുകയും ചെയ്തു.
സാംസ്ക്കാരിക ചരിത്രം
സമ്പന്നമായൊരു സാംസ്ക്കാരിക പൈതൃകമാണ് പൂതക്കുളത്തിനുളളത്. നിരവധി സാംസ്ക്കാരിക നായകന്മാര്ക്ക് ഈ പ്രദേശം ജന്മം നല്കിയിട്ടുണ്ട്. ഗ്രന്ഥശാലകളും കലാ സമിതികളും ഉള്പ്പെടെ ധാരാളം സാംസ്ക്കാരിക സ്ഥാപനങ്ങള് ഇവിടെയുണ്ട്. 1949 ല് ഊന്നിന്മൂട് കേന്ദ്രമാക്കി വിവേകോദയം ആര്ട്സ് ക്ളബ് പ്രവര്ത്തിച്ചിരുന്നു. ഈ സമിതിയുടെ നേതൃത്വത്തില് ഒരു വായനശാലയും കേരളോദയം എന്ന ഒരു കൈയ്യെഴുത്തുമാസികയും പ്രസിദ്ധീകരിച്ചിരുന്നു. ഇക്കാലയളവില് എസ്.ബി.എന്.വി ആര്ട്സ് ആന്ഡ് സ്പോര്ട്സ് ക്ളബ്, കേരളോദയം കലാകേന്ദ്രം തുടങ്ങിയ കലാ സമിതികളും പൂതക്കുളത്തെ സാംസ്ക്കാരിക പ്രവര്ത്തനങ്ങള്ക്ക് ഗണ്യമായ സംഭാവന നല്കിയിട്ടുള്ളവയാണ്. ശങ്കരപിളള സ്മാരക ഗ്രന്ഥശാല, ഗാന്ധി സ്മാരക വായനശാല, ഐക്യകേരള ഗ്രന്ഥശാല എന്നിവ ആദ്യകാലംമുതല്ക്കേ സ്തുത്യര്ഹമായ രീതിയില് പ്രവര്ത്തിച്ച് വരുന്ന സാംസ്ക്കാരിക സ്ഥാപനങ്ങളാണ്. പൂതക്കുളം സര്വ്വീസ് സഹകരണ ബാങ്ക് കേന്ദ്രമാക്കി ഒരു ഫൈന് ആര്ട്സ് സൊസൈറ്റി നല്ല രീതിയില് പ്രവര്ത്തിച്ചുവരുന്നു. ഇവിടെ ജീവിച്ചിരുന്ന പ്രശസ്തരായ കഥകളി നടന്മാരായിരുന്നു കൊക്കാടന് നാരായണപിള്ള, തെറ്റിക്കുളം പരമുപിള്ള തുടങ്ങിയവര്. നൃത്തകലയില് പ്രശസ്തനായിരുന്ന ഗുരു ഗോപിനാഥ് കൊക്കാടന് നാരായണപിള്ളയുടെ ശിഷ്യനായിരുന്നു. ആദ്യകാലത്ത് പ്രശസ്തരും ഇന്ന് ജീവിച്ചിരിക്കുന്നവരുമായ കഥകളി നടന്മാരാണ് നീലമനഇല്ലം കൃഷ്ണന് നമ്പൂതിരി, ശങ്കരന് നമ്പൂതിരി, ചെമ്പകശ്ശേരി പുത്തന്വീട്ടില് ഗോപാലപിളള തുടങ്ങിയവര്.
ആരാധനാലയങ്ങള്
പൂതക്കുളം പഞ്ചായത്തിന്റെ ഹൃദയഭാഗത്ത് സ്ഥിതി ചെയ്യുന്ന ശ്രീധര്മശാസ്താ ക്ഷേത്രത്തിന് 50 കൊല്ലത്തിലേറെ പഴക്കമുണ്ട്. ഒരു കാലത്ത് ഘോരവനമായിരുന്ന ഈ പ്രദേശത്ത് കാടു വെട്ടിത്തെളിച്ച അവസരത്തില് വാള് കല്ലില് കൊണ്ട് രക്തനിറം കാണപ്പെടുകയും പ്രശ്നവിധി പ്രകാരം ക്ഷേത്രം പണിതെന്നുമാണ് ഐതിഹ്യം. ശ്രീ മാര്ത്താണ്ഡവര്മ മഹാരാജിവന്റെ കാലത്ത് ഇവിടത്തെ അഞ്ചു കുടുംബങ്ങളില് നിന്നുള്ള വ്യക്തികള് അദ്ദേഹത്തെ മുഖം കാണിക്കുകയും ക്ഷേത്രവുമായി ബന്ധപ്പെട്ട ഐതിഹ്യകഥ അദ്ദേഹത്തെ ധരിപ്പിക്കുകയും ചെയ്തു. അതിന്പ്രകാരം മഹാരാജാവ് എട്ടര യോഗത്തിലുള്പ്പെട്ട കൊല്ലൂര് അത്തിയറ മഠം പോറ്റിമാര്ക്ക് ക്ഷേത്രം നിര്മിക്കാന് അവകാശം നല്കി. ഐതിഹ്യപ്രകാരം രക്തക്കറകണ്ട ശിലയില് നിന്നും സ്വയംഭൂവായി പ്രതിഷ്ഠിക്കപ്പെട്ടിട്ടുളളതാണ് ഇവിടത്തെ പ്രതിഷ്ഠ എന്നു പറയപ്പെടുന്നു. മറ്റു ക്ഷേത്രങ്ങളില് നിന്നു വ്യത്യസ്തമായി എപ്പോഴും കാറ്റും മഴയും വെയിലും കൊള്ളത്തക്കവിധത്തിലാണ് ഈ ക്ഷേത്രത്തിന്റെ ശ്രീകോവില് പണിതിരിക്കുന്നത്. മറ്റൊരു പ്രധാന ക്ഷേത്രമായ ഈഴംവിള ദേവിക്ഷേത്രത്തിനു 300 വര്ഷത്തെ പഴക്കമുണ്ട്. സാധാരണ ദേവീക്ഷേത്രങ്ങളില് നിന്നു വ്യത്യസ്തമായി വടക്കോട്ടു ദര്ശനമുളള ദേവീപ്രതിഷ്ഠയാണ് ഇവിടത്തെ പ്രത്യേകത. വളരെ പുരാതനമായ മറ്റൊരു അമ്പലമാണ് കലയ്ക്കോട് അമ്മവാസത്ത് ദേവീക്ഷേത്രം. ഈ ക്ഷേത്രം സ്ഥാപിച്ചത് അകവൂര് മനയ്ക്കല് മഠക്കാരായിരുന്നു. ഭൂപട, അന്നംകെട്ട്, തോറ്റംപാട്ട്, കഥകളി തുടങ്ങിയ കലാരൂപങ്ങള് ഇവിടത്തെ ഉത്സവത്തിന്റെ പ്രത്യേകതയാണ്. ഇവ കൂടാതെ നിരവധി ക്ഷേത്രങ്ങളും സര്പ്പക്കാവുകളും ഇവിടെ നിലവിലുണ്ട്. നെല്ലേറ്റിലും കലയ്ക്കോടും ഓരോ ജുമാ-അത്ത് പള്ളികളുണ്ട്. കലയ്ക്കോട് സ്ഥിതിചെയ്യുന്ന ലിറ്റില് ഫ്ളവര് ചര്ച്ച് വിശുദ്ധ കൊച്ചുത്രേസ്യയുടെ തിരുനാമത്തില് സ്ഥാപിച്ചിട്ടുള്ളതാണ്. ഇതിന് 62 കൊല്ലത്തെ പഴക്കമുണ്ട്.
ആതുരസേവനരംഗം
ഈ നാട്ടിലെ എല്ലാ ജനങ്ങളുടെയും ആദരവും ബഹുമാനവും ലഭിച്ചിരുന്ന പുളിമൂട്ടില് ശങ്കരപ്പിള്ള അതിനിപുണനായ ഒരു വിഷവൈദ്യനും സംസ്കൃതപണ്ഡിതനുമായിരുന്നു. സര്പ്പവിഷത്തിനു പച്ചമരുന്നുകൊണ്ട് ചികിത്സ നല്കുന്നതില് പ്രഗത്ഭനായിരുന്ന ഒരു വിഷവൈദ്യനായിരുന്നു ഇദ്ദേഹം. വിഷചികിത്സയ്ക്കു പുറമേ മറ്റനേകം മേഖലകളില് അദ്ദേഹം പ്രശസ്തി നേടിയിരുന്നു. ഒരു ഭജനഗാനരചയിതാവു കൂടിയായിരുന്ന അദ്ദേഹം തിരുവാതിരക്കളി, കമ്പടികളി എന്നിവയ്ക്ക് ഗാനങ്ങള് രചിക്കുകയും ആ കലാരൂപങ്ങളെ വേണ്ടവിധം പ്രോത്സാഹിപ്പിക്കുകയും ചെയ്തിരുന്നു. ആധുനിക വൈദ്യചികിത്സയ്ക്ക് പരവൂര്, പൂതക്കുളം പ്രദേശങ്ങളില് തുടക്കംകുറിച്ചത് ഡോ. പി.കൃഷ്ണന്നായരായിരുന്നു. ഹരിജനങ്ങള്ക്കും താണ വരുമാനക്കാര്ക്കും ഒരാശ്രയകേന്ദ്രമായിരുന്നു അദ്ദേഹത്തിന്റെ ആതുരാലയം. ഏകദേശം 40 വര്ഷങ്ങള്ക്കു മുമ്പാണ് ഈ പഞ്ചായത്തില് ഒരു പ്രാഥമിക ആരോഗ്യകേന്ദ്രം സ്ഥാപിച്ചത്. ഇത്തിക്കര ബ്ളോക്കില് ആദ്യമായി അനുവദിക്കപ്പെട്ട ഈ പി.എച്ച്. സി.യുടെ കീഴില് 5 മിനി പി.എച്ച്.സി.കളും ജനസംഖ്യാനുപാതികമായി പ്രവര്ത്തിക്കുന്ന കുടുംബക്ഷേമകേന്ദ്രങ്ങളുമുണ്ട്. പട്ടികജാതി പട്ടികവര്ഗക്കാര്ക്കും താഴ്ന്ന വരുമാനക്കാര്ക്കും ഒരു ആശ്രയകേന്ദ്രമാണ് ഈ ആതുരാലയം. ആതുരശുശ്രൂഷാരംഗത്ത് സ്വകാര്യാശുപത്രികള്ക്കു പുറമേ രണ്ടു പാരമ്പര്യ വൈദ്യശാലകളും ഇവിടുണ്ട്.
വ്യവസായമേഖല
ചെറുകിട വ്യവസായം എന്ന നിലയില് കയറും പരമ്പരാഗത വ്യവസായം എന്ന നിലയില് കൈത്തറിയുമാണ് ഇവിടത്തെ പ്രധാന വ്യവസായങ്ങള്. കയര് വ്യവസായ മേഖലയില് പ്രവര്ത്തനമാരംഭിച്ച ആദ്യത്തെ സഹകരണ സംഘമാണ് കലയ്ക്കോട് ക്യു 23-ാം നമ്പര് കയര് വ്യവസായ സഹകരണ സംഘം. ഇതുകൂടാതെ ഇടയാടിയിലും നെല്ലേറ്റിലും ഓരോ സംഘങ്ങള് പ്രവര്ത്തിക്കുന്നു.
സഹകരണരംഗം
സഹകരണപ്രസ്ഥാനത്തിന്റെ ചരിത്രത്തില് നിര്ണായകമായ സ്ഥാനമാണ് പൂതക്കുളം പഞ്ചായത്തിനുള്ളത്. ഇവിടെ പ്രധനമായും രണ്ടു വായ്പാസഹകരണസംഘങ്ങളാണ് പ്രവര്ത്തിക്കുന്നത്. കൊല്ലവര്ഷം 1101-ാമാണ്ട് കുംഭമാസം 13-ാം തിയതി രജിസ്റ്റര് ചെയ്ത കലയ്ക്കോട് ദേവീവിലാസം പരസ്പര നായര് സഹായസഹകരണ സംഘം 1957 ല് വിവിധോദ്ദേശ്യ സഹകരണസംഘമായും തുടര്ന്ന് റീജിയണല് സഹകരണബാങ്കായും മാറുകയുണ്ടായി. പില്ക്കാലത്ത് കലയ്ക്കോട് സര്വീസ് സഹകരണബാങ്ക് എന്ന പേരിലറിയപ്പെടാന് തുടങ്ങിയ ഈ സ്ഥാപനത്തിന് 1967-68 ല് ജില്ലാതലത്തില് നല്ല ബാങ്കിനുള്ള ട്രോഫിയും 68-69 ല് ജില്ലാതലത്തില് ട്രോഫിയും ലഭിച്ചു. 1948 ല് പാണാട്ട് ചിറ കുഴിക്കുന്നതിനു വേണ്ടി രൂപീകരിക്കപ്പെട്ട കര്ഷകസംഘമാണ് പൂതക്കുളം കര്ഷക സഹകരണസംഘമായിത്തീര്ന്നത്. ഈ സംഘം പിന്നീട് 1951 ല് പൂതക്കുളം സര്വീസ് സഹകരണസംഘമായി രജിസ്റ്റര് ചെയ്യപ്പെട്ടു.
